:: Supersagu Beltza.

Emakumeen eskubideak defendatzeko asmoz sortu zen Ukrainian Femen taldea. Sobiet Batasuneko errepublika ohian jokatu zen Europako futbol txapelketa aprobetxatu zuten taldeko kideek sexu-turismoa salatzeko. Hasierako ospea gehiago zor izan zioten titiak airean eramateari zabaldu nahi zuten mezuari baino. Izan ere, gehienek protagonismoa bilatzen zuten neska lotsabakotzat hartu zituzten. Hala ere, emakume horien ekintza ausartek Ukrainiako mugak gainditu zituzten, betiere sexu-berdintasun eta laikotasunaren izenean.

Pasa den astean Madrilgo kongresuan protesta egin zuten PPren gobernuak abortuaren legeari ezarri nahi dizkion murrizketen aurka. Hedabideen arreta erakarri bazuten ere, alde guztietatik kritika gogorrak jaso dituzte. Batzuen ustez, parlamentuan protesta egitea demokrazia urratzea da, parlamentua herritarron borondatearen isla delako. Beste batzuk, berriz, mezuarekin bat datoz, baina ez dute zilegi ikusten emakumearen gorputza biluztea emakumeen eskubideak aldarrikatzeko orduan.

Larunbatean, telebistako saio batean astindu ederra eman zion Femen-eko kide batek Hermann Tertsch kazetariari eta harrapariak harrapakin utzi behar izan zuen debatea. Beraz,  argi dago gorputza baino zerbait gehiago direla buru loreduneko feminista hauek.

Lara Alcazar Femen-en bozeramailea (El Mundoren argazkia)

Ez dakit zertan geratuko den emakume hauen borroka, baina neuri, behintzat, min handiagoa ematen dit parlamentuan ministro batek soldatak ez direla jaitsi esateak emakume batzuen titiak ikusteak baino. Ez dut inor mindu nahi, baina… prefiero que me enseñen las tetas a que me toquen las pelotas.