Azken asteotan balkoiak elkartasuna adierazteko gune bihurtu ditugu. Balkoietatik egiten ditugun txaloaldietan  ataka honetatik  irteten laguntzen diguten  zaindari zintzoei gorazarre egiten diegu. Ez dago zalantzarik, txaloak eta elkartasun-adierazpenak ondo merezita dituzte, baina gorazarre-zurrunbilo horretatik  asko eta asko kanpo geratzen direlako irudipena dut. Euren negozioen ateak itxi behar izan dituzten dendari eta autonomoek, langabezian geratu edo geratuko  diren milaka langilek, gure nagusiez arduratzen diren zaindariek (asko eta asko emakumezkoak eta etorkinak),  supermerkatuetako kutxazainek eta abar luze batek ere gure elkartasuna eta esker ona merezi dute. Horiek gure babesa behar dute, bai aste hauetan bai txaloen oihartzuna isiltzen denean. Izan ere, elkartasun-uholde honek iraungipen-data badu, irakaspen eskasa aterako dugu krisialdi honetatik.