:: Maite González Bilbao.

Domekan Llorentek hirugarren partida jarraian jokatu zuen titular moduan. Denboraldian guztira zortzitan jokatu du partida hasieratik eta hiru gol sartu ditu. Datuak ikusita Llorenteren zenbakiak oso pobreak dira! Internazionala izan nahi duen futbolari batentzat hauek ez dira batere zenbaki onak.

Harrituta geratu naiz partidaren ostean, bai kroniketan bai sare sozialetan, irakurritako iritzietan gola sartzeagatik egiten zen Llorenteren defentsa ikusita. Badirudi partidako protagonista bakarra bera izan zela. Benetan ikaragarria! Llorentek bere lana egin zuen, futbolean jokatu eta golak sartu, eta orain denboraldi osoan izandako gorabeherak gola sartu duelako ahaztu behar ditugula ematen du.

Ni Llorente zalea izan naiz. Orain ez daukat hain argi, eta ez da beraren fitxaketak sortu duen iskanbilagatik. Denboraldi honetan Athletic-eko jokalaria izango zela jakinda, Llorentek hartutako jarrerak asko molestatu nau. Haren partetik gehiago espero nuen. Nik, une honetan, zalantzan jartzen ditudan “gainkarga” eta “lesioak” ez datoz bat Champions-a jokatu nahi duen jokalari profesional baten irudiarekin. Gainera orain dela egun batzuk Bielsak aitortu zuen bezala, “Llorenteren arazoa ez da fisikoa, sasoiarena baizik”; hau da, ez da motibatuta sentitzen bere kirol-bizitzan hain garrantzitsua izan den taldean. Llorenteri gogoratu beharko genioke pasa den urteko denboraldiari esker Europako talde askok jakin zutela nor zen Fernando Llorente Torres.

San Mamesera joaten naizenean txalotzera eta animatzera joaten naiz, eta ez txistu egitera. Zelaian dauden jokalariak “nireak” dira eta nire koloreak defendatzen dituzte, edo behintzat hori suposatzen da, eta berdin zait zelaian Llorente, Aduriz edo Toquero badaude. Athletic eta beraren historia edozein jokalariren gainetik dago.