::Mikel Etxebarria.

Atzoko eguna Plentzia eta Gorlizen eman genuen. Hamaikaetabateko kide batzuk piragua -txango bat  egitera hurbildu ginen Uribe Kostara.  Helburua bikoitza zen: egun ona pasatzea eta piraguen gobernuan trebatzea peñakide guztientzako irteera  antolatu ahal izateko.

eskifaia eta ontziak

Bi pertsonentzako boteak  alokatu genituen (15 euro orduko eta piraguako) hondartza ondoko kaian.  Motxilak postuan bertan  utzi ondoren, itsasadarrera ematen duen arrapala batetik uretaratu ginen.  Han arraunei heltzen, oreka gordetzen, maniobrak egiten … trebatu ostean, itsasora sartu ginen itsasadarraren bokaletik. Giro ederra zegoen: itsasoa bare-bare eta aurreko egunetakoa baino tenperatura epelagoa.  Bainatu ostean, bueltarako bideari eman genion, apur bat gogorragoa nekeagatik eta itsasaldia aurka edukitzeagatik.

«profesionalaren irakaspenei adi»

Inor piraguen ziurtasun ezaren beldur bada, lasai egon, oso zabalak eta egonkorrak dira. Gainera, eroriz gero, ez dago arazo handirik, salbamendu-jaka jantzita egin behar da eta. Aholku gisa, honako hauek aipatuko nituzke:  batetik, eguzki-krema erruz erabiltzea eta, bestetik, oinutsik ez joatea, hondoko harkaitzen erruagatik aberiarik ez egiteko.

Boteak utzieta gero, Kilimanjaro izeneko garagardotegira joan ginen. Hara heltzeko Gorlizeko erietxera doan errepidea  hartu behar, baina  adi egon, errepidetik ez baita ikusten. Udan joan nahi bada, erreserbatu aurretiaz eta mahia kanpoan eskatu, ederto egoten da eta. Dena gozo-gozo zegoen, tortilla batez ere.  Halako lokal askotan ez bezala, janari ona eta zerbitzu arina zein atsegina.

Amaitu baino lehen, Bilbon ere piraguez gozatzeko aukera dugula gogoratu nahi dizuet. Datorren kurtsoari begira horrelako irteera bat aurreikusita daukagu, baina uda honetan bertan hamaikatar batzuk animatzen bazarete, jarri harremanetan gurekin eta antolatuko dugu.