Lehengo larunbatean Atletico Feminas taldeari irabazi ostean Athleticeko neskek errazago daukate liga irabaztea. Sailkapeneko hirugarrenari  irabazi izanak eskura jarri die txapelketa  bilbotarrei eta, gauzak ondo bidean, beste titulu bat eskuratuko dute aspaldiko partez.

Lesio larriak gorabehera, Athleticek denboraldi zoragarria egin du eta ustez handiagoak ziren beste talde batzuen aurka  aritu da inolako konplexurik gabe.

Balentria handia baina oihartzun txikia. Igandeko egunkari guztietan begiratuta, aipamenik ez lehenengo orrietan. Barrukoetan, betiko moduan, futbolari buruzko berri ugari, baina gehienak gizonezkoen futbolari zegozkion: Laporteren fitxaketa, Zamudioren garaipena Laredon, Barakaldo eta Leioaren partiden aurreko kronika …  Hirugarren eta Bigarren Bko partidak izan arren, askoz arreta handiagoa eskaini zieten Ohorezko Mailaren titulurako erabakigarria izan zitekeen partida bati baino. Egia esan, hemengo prentsaz ezin gehiagorik espero; izan ere, pasa den astean ez zen kazetaririk agertu Joseba Agirreren, entrenatzailearen, prentsaurrekora.

Kirol-kazetari batzuek eztabaida kirola baino gustukoagoa dute; beraz, ez harritu taldeaz paso egin duten kazetari horiek hemendik gutxira gabarraren kontura bazterrak nahasten hasten badira.