Tristea da kirol-lorpen batek Athletic jomugan jartzea eta poza izan behar zuena eztabaida bihurtzea. Nire ustez, zuzendaritza-taldea oker dago eta gabarra atera beharko zuen bi arrazoirengatik: emakumezkoek erakutsi duten kirol-mailagatik eta  gizonekiko berdintasunagatik. Gainera, taldearen filosofia kontuan hartuta,  Athletic  kalera ateratzeko eta  zaleengana hurbiltzeko aukera ez da inoiz alferrik galdu behar.

Hala ere, taldearen erabakiaren aurka egoteak ez du esan nahi kontu honi buruzko iritzi eta jarrera guztiak zilegi direnik. Komunikabideak agerian geratu dira eta izan duten jarrera negargarria izan da. Urte osoan zehar ia ez diote aipamenik egin taldearen kirol-ibilbideari, baina azken egunotan orriak eta orriak bete dituzte gabarrari esker. Egia esan prentsarenak ez nau batere harritu, komunikabideek horrela jokatuko zutela gauza jakina baitzen; sinadura-bilketa horrek, ordea, bai eman didala atentzioa. 30. 000 zalek? eman dute sinadura gabarra ateratzearen alde. Horrelako ekimena positiboa da, baina berdintasuna eta emakumezkoen kirola askoz hobetu sustatzen dira harmailak beteaz eta zelaian bertan animatuz.

Amaitu baino lehenago, lerro hauetatik gorazarre egin nahi diet  BM Santutxu Atletismo Taldeko emakumeei. Behin baino gehiagotan Espainiako kros eta maratoi txapeldunak izan dira eta ez dute inoiz piztu prentsa edo zaleen arreta edo babesa.