Pertsona, talde eta erakunde batzuek besteen pentsaera eta bizimodua kontrolatu nahi  dituzte. Ziur daude pentsamolde zuzen eta duin  bakarra  dagola, eurena. Haiekin ados egon ezean, zibilizazioaren etsai  bihurtuko zara eta, horrela, gizartearen eta ezarritako ohitura onen  izenean jomugan jarriko zaituzte.

Horren guztiaren adibide dugu Madrilen geldiarazi duten autobus homofobo hura. HazteOir erakundeak haur batzuen sufrimendua areagotu nahi du inmorala den moral  baten izenean. “Trans” haurrek guztion maitasuna, laguntza, babesa eta enpatia  behar dituzte. Ume haien gurasoek seme-alabenganako begirunea baino ez dute eskatzen, ez diote inori kalterik egiten. Baina,  zoritxarrez, beren burua katoliko zorrotz eta zuzentzat daukaten zenbaitek  gorroto-kanpaina abiarazi dute ume babesgabe batzuen aurka.

Maitasuna, laguntza, babesa ematea, enpatia … ez ote ziren kristauek gorde beharreko baloreak? Konturatu barik , HazteOir  eta enparauak  hainbeste ikaratzen dituen deabruaren zerbitzari zintzoak baino ez dira.